انواع الشعر

كيف تحدّدين نوع شعرك بخطوات سهلة؟

عشان تحصلي على أفضل نتيجة من أي منتج بتستخدميه لشعرك، مهم جداً تبقي عارفة ان كل نوع شعر له احتياجاته الخاصة، والاحتياجات دي بتعتمد بشكل كبير على نوع الشعر. يعني هل هو ناعم؟ خشن؟ مموج؟ جاف؟ أو دهني؟

والاحتياجات دي عباره عن طبيعة المكونات(زبدات، زيوت، مواد فعاله)  و نوع المنتج نفسه (كريم، زيت، سيروم) بعيدا عن اسم العلامة التجارية. يعني سواء كان المنتج من شركة معروفة أو شركة صغيرة، المهم هو إن المكون يناسب نوع شعرك.

 وده هو السبب وراء إنك تلاقي أحياناً منتج معين ناس بتشكر فيه جداً، وناس تانية تقول إنه مش مناسب لها. لأن السر كله إن كل نوع شعر بيحتاج منتج بتركيبة معينة تلائم طبيعته.

لذلك علشان توصلي لأفضل نتيجة مع أي منتج لشعرك، في ثلاث خطوات أساسية لازم تمشي فيهم بالترتيب:

1- تحديد نوع شعر

هل هو دهني؟ جاف؟ عادي؟ ناعم؟ خشن؟ مستقيم؟ مموج؟ كيرلي؟

معرفة نوع شعرك هي نقطة البداية، لأنها بتحدد احتياجاته الفعلية.

2- تحديد نوع المنتج المناسب

بعد ما تعرفي نوع شعرك، تبدأي تختاري نوع المنتج المناسب له:

كريم؟ زيت؟ سيروم؟ ليف إن؟ ماسك؟

هنا التركيز يكون على طبيعة المكونات ووظيفتها، مش على اسم الشركة أو شهرتها.

3- طريقة الاستخدام الصحيحة

حتى لو المنتج مناسب لنوع شعرك ١٠٠٪، استخدامه بطريقة غلط ممكن يدي نتيجة عكسية تماماً:

– كمية زيادة

– استخدامه على شعر مبلول بدل جاف أو العكس

– تركه وقت أطول أو أقل من المطلوب

– وضعه على فروة الرأس رغم إنه مخصص للأطراف فقط

كل ده ممكن يخلي ناس تقول على نفس المنتج “رائع” وناس تانية تقول “سيئ جداً”، والفرق الحقيقي بيكون في طريقة الاستخدام.

في المقال ده، هنعرف مع بعض: إيه هي أنواع الشعر؟ وإزاي تقدري تحددي نوع شعرك خطوة بخطوة.

قبل ما نبدأ نتكلم عن أنواع الشعر، مهم نفهم إن مفيش تقسيمة واحدة بس ثابتة. الشعر ليه كذا صفة مختلفة، وكل صفة ليها تقسيمة خاصة بيها. علشان كده نقدر نقول إن أنواع الشعر بتتقسم تقريبًا لـ 5 محاور أساسية:

1- نوع الفروة والإفرازات

هل فروة الرأس دهنية، جافة، عادية، ولا مختلطة (دهون في الجذور وجفاف في الأطراف)؟

أولًا: يعني إيه نوع الفروة والإفرازات؟

فروة الرأس فيها غدد دهنية صغيرة بتفرز الزهم (الزيوت الطبيعية).

الزيوت دي مهمتها ترطّب الفروة وتحمي الشعرة، لكن لو زادت أو قلت بشكل واضح بتعمل مشاكل.

علشان كده بنقسّم فروة الرأس لأربع أنواع رئيسية:

1. دهنية
2. جافة
3. عادية
4. مختلطة (دهون في الجذور + جفاف في الأطراف)

1- فروة الرأس الدهنية

• العلامات:

الشعر يزيت بسرعة جدًا بعد الغسيل (أحيانًا في نفس اليوم أو اليوم اللي بعده).

خصل الشعر تلزق في بعض وتبان “مكلكعة” أو مسطحة على الرأس.

إحساس بثقل في الشعر أو مظهر غير نظيف بسرعة.

قشرة دهنية مصفرة أحيانًا، مع حكة خفيفة أو متوسطة.

الأسباب الشائعة:

• نشاط زائد للغدد الدهنية (عامل وراثي أو هرموني).
• غسيل مبالغ فيه بشامبو قوي → الفروة ترد بزيادة إفراز الدهون.
• استخدام زيوت وكريمات ثقيلة على الفروة نفسها.
• الجو الحار مع العرق وغطاء الرأس لفترات طويلة.

ملاحظات للعناية :

• استخدام شامبو لطيف مخصص للفروة الدهنية.
• تجنب وضع البلسم والماسكات على الفروة؛ تُستخدم على الأطراف فقط.
• تقليل الزيوت الثقيلة على فروة الرأس.
• تجنب لمس الشعر كل شوية بالأيدين (دهون الأيدين بتزيد المشكلة).

2- فروة الرأس الجافة

العلامات:

• إحساس بشد أو جفاف في الفروة بعد الغسيل، أحيانًا مع حكة.
• قشور صغيرة خفيفة وجافة تشبه “التراب الأبيض”.
• مظهر الشعر باهت، هيشان، وقلة لمعان.
• أحيانًا كهرباء في الشعر خصوصًا في الجو الجاف.

الأسباب الشائعة:

• استخدام شامبو قوي أو فيه مواد منظفة قاسية.
• غسيل الشعر بمياه سخنة جدًا.
• الجو البارد الجاف أو المكيفات لفترات طويلة.
• نقص في إفراز الزيوت الطبيعية من الفروة.

ملاحظات للعناية:

• استخدام شامبو لطيف مرطّب ومياه فاترة بدل السخنة.
• تقليل عدد مرات الغسيل على قد ما مناسب لأسلوب الحياة.
• ممكن استخدام زيوت خفيفة/تونر مرطّب للفروة (كمية بسيطة وبطريقة صحيحة).
• تجنب الكحوليات القوية في منتجات الفروة.

3- فروة الرأس العادية

العلامات:

• الشعر يفضل شكله طبيعي ونضيف لمدة ٢–٣ أيام بعد الغسيل بدون ما يكون مزيت أو ناشف.
• مفيش حكة مزعجة ولا قشور واضحة.
• مظهر الشعر متوازن؛ لا هو لامع زيادة بشكل دهني ولا مطفي وجاف.

دي أحسن حالة ممكنة:

هنا الغدد الدهنية شغالة بمعدل مناسب، والفروة متوازنة.

ملاحظات للعناية:

• الحفاظ على روتين متوازن: شامبو لطيف، بلسم على الأطراف، ماسك من فترة للتانية.
• عدم الإفراط في الزيوت أو في الشامبوهات القوية عشان التوازن ما يختلش.

4- فروة الرأس المختلطة

العلامات:

• جذور دهنية بتتزيت بسرعة، خصوصًا عند الغرّة ومنطقة التاج.
• أطراف الشعر جافة أو متقصّفة ومجهدة.
• ممكن تلاقي الفروة من فوق شكلها دهني، لكن الشعر نفسه ناشف ومش سهل في التسريح.

الأسباب:

غدد دهنية نشيطة في فروة الرأس.

مع أطراف تعرضت لحرارة، صبغات، بروتين… إلخ، فبقت جافة وتالفة.

ملاحظات للعناية:

• اختيار شامبو يناسب الفروة الدهنية، مع التركيز في الغسيل على الجذور أكتر.
• الاهتمام بالأطراف بماسكات مغذيّة وبلسم مركز، مع تجنب ملامسة الجذور.
• لو هتستخدم زيوت، تكون غالبًا على الأطراف فقط، مش على الفروة.

2-شكل الشعر (الشكل أو النمط)

شكل خصلة الشعر نفسها: مستقيم، مموج، كيرلي (مجعد)، أو شديد التجعيد.

3-ملمس وسماكة الشعرة

هل الشعرة نفسها نعمة ولا خشنة؟ رفيعة، متوسطة، ولا سميكة؟

4-كثافة الشعر

هل الشعر خفيف، متوسط الكثافة، ولا كثيف؟ يعني عدد الخصلات على فروة الرأس.

5- مسامية الشعر

مسامية الشعر: يعني إيه؟ وكيف تعرفين مسامية شعرك؟

مسامية الشعر هي قدرة الشعرة على امتصاص الماء والمنتجات والاحتفاظ بها داخلها.

المسامية مرتبطة بشكل أساسي بحالة الطبقة الخارجية للشعرة (الكيوتيكل):

• لو الكيوتيكل مقفولة ومرتّبة → الميه والمنتجات تدخل بصعوبة وتخرج بصعوبة.
• لو الكيوتيكل مرفوعة وفيها فراغات → الميه والمنتجات تدخل بسرعة وتخرج بسرعة.

لذلك نقسم مسامية الشعر إلى ثلاث درجات رئيسية: منخفضة – متوسطة – عالية.

1. الشعر منخفض المسامية

• يتبلّ بصعوبة تحت الدش ويأخذ وقتًا طويلًا حتى يبتل بالكامل.
• يجف ببطء شديد بعد الغسيل.
• المنتجات (كريمات وزيوت) غالبًا “تقعد على السطح” ولا تُمتص بسهولة.
• عادةً يبدو لامعًا لكنه يتزربن بسرعة مع أي كمية زيادة من المنتج.

السبب:

طبقة الكيوتيكل مقفولة بإحكام، لذلك يصعب دخول الماء والمكونات إلى داخل الشعرة.

الأنسب له:

منتجات خفيفة، مع استخدام حرارة بسيطة عند عمل الماسكات (فوطة دافئة أو كاب حراري خفيف) لمساعدة المكونات على الدخول.

2. الشعر متوسط المسامية

• يمتص الماء والمنتجات بشكل متوازن.
• لا يتأخر كثيرًا في البلل أو في التجفيف.
• يستجيب جيدًا لمعظم الروتينات إذا كانت متوازنة.

السبب:

الكيوتيكل حالتها وسط؛ ليست مغلقة تمامًا ولا مفتوحة جدًّا.

الأنسب له:

روتين متوازن بين الترطيب والبروتين مع استخدام منتجات ليست خفيفة جدًا ولا ثقيلة جدًا.

3. الشعر عالي المسامية

يتبلّ بسرعة كبيرة تحت الدش ويجف بسرعة بعد الغسيل.

يميل للجفاف والهيشان والتقصّف.

يتأثر جدًا بالرطوبة في الجو وينفش بسهولة.

السبب:

الكيوتيكل مرفوعة ومفتوحة وفيها فراغات، غالبًا بسبب صبغات متكررة، حرارة عالية، أو تلف سابق.

الأنسب له:

ترطيب عميق منتظم، مع استخدام كريمات وزيوت وسيروم تساعد على “غلق” الكيوتيكل وتقليل هروب الرطوبة، مع تجنب الحرارة والصبغات قدر الإمكان.

💡 ملاحظة مهمّة:

مسامية الشعر عامل واحد فقط من عوامل كثيرة. ممكن يكون الشعر ناعم ومساميته عالية، أو خشن ومساميته منخفضة. لذلك من الأفضل النظر للمسامية بجانب شكل الشعر، كثافته، وملمسه؛ عشان في النهاية تختاري طريقة الترطيب ونوع المنتج الأنسب لطبيعة شعرك.

حالة الشعر الصحية

هل الشعر سليم وطبيعي، ولا تالف/مجهد من صبغات، سشوار، بروتين، أو مواد كيميائية؟

كل محور من المحاور دي بيساعدنا نفهم جزء مختلف من شخصية شعرك، ولما نجمّعهم مع بعض نقدر نكوّن صورة كاملة عن نوع شعرك واحتياجاته الفعلية.

إزاي تحددي نوع شعرك خطوة بخطوة؟

1️⃣ نوع الفروة والإفرازات (دهني/جاف/عادي/مختلط)

الخطوة العملية: اختبار اليوم الواحد

اغسلي شعرك بشامبو لطيف، من غير أي زيوت أو كريمات على الفروة.

استني 24 ساعة من غير ما تغسليه تاني.

بعد 24 ساعة:

لو الفروة دهنية بوضوح والشعر لازق في بعض → فروة دهنية

لو الفروة مش دهنية ولا جافة ومريحة → فروة عادية

لو حاسة بشد/حكة وجفاف وقشور خفيفة → فروة جافة

لو الجذور دهنية والأطراف نشفة ومتقصفة → فروة مختلطة

اختبار منديل الفروة بعد ٢٤ ساعة:

• اغسلي شعرك كالمعتاد، وبعد ٢٤ ساعة.

• اضغطي برفق بمنديل ورقي على فروة الرأس في أكثر من منطقة.
• لو طلع على المنديل لمعة زيتية واضحة في معظم المناطق → فروة دهنية.
• لو مافيهاش أي لمعة مع إحساس جفاف أو شد → فروة جافة.
• لو لمعة خفيفة في مناطق بسيطة مع إحساس مريح → فروة عادية.
• لو منطقة الجذور دهنية وباقي الشعر جاف ومتقصف → فروة مختلطة.

2️⃣ شكل الشعر (مستقيم – مموج – كيرلي – شديد التجعيد)

الخطوة العملية: اتركيه يجف بطبيعته

بعد غسيل الشعر، سيبيه ينشف طبيعي من غير سشوار أو ربط أو فرش.

راقبي شكل الخصلة بعد ما ينشف:

نازل لتحت مافهوش أي تموّج → مستقيم (Straight)

فيه تموّج بسيط على شكل حرف S → مموج (Wavy)

لَفّات واضحة وحلقات → كيرلي (Curly)

لفّات ضيّقة جداً ومضغوطة/أفرو → شديد التجعيد (Coily)

3️⃣ ملمس وسماكة الشعرة (ناعمة/متوسطة/خشنة – رفيعة/سميكة)

الخطوة العملية: اختبار اللمس + المقارنة بالخيط

خدي خصلة صغيرة بين صباعينك وامسكيها:

لو بالكاد حاسة بيها وملمسها حريري → شعر ناعم ورفيع

لو حاسة بيها بوضوح لكن مش خشنة → متوسط

لو الشعرة واضحة وسميكة وملمسها ناشف شوية → خشن/سميك

تقدري كمان تقارني شعرة بخيط خياطة رفيع:

أرفع من الخيط → رفيعة

قريب من الخيط → متوسطة

أسمك من الخيط → سميكة

4️⃣ كثافة الشعر (خفيف – متوسط – كثيف)

الخطوة العملية: اختبار فرق الشعر

اقفي قدام مراية في ضوء كويس.

فرّقي شعرك من النص أو من أي جهة تعملي فيها فرق طبيعي.

بصّي على فروة الرأس:

لو فروة الرأس باينة جداً من كذا اتجاه → شعر خفيف

لو بتبان لكن مش قوي → كثافة متوسطة

لو بالكاد بتبان رغم الفرق → شعر كثيف

5️⃣ مسامية الشعر (عالية – متوسطة – منخفضة)

كيف تختبرين مسامية شعرك في البيت؟

يمكنك استخدام أكثر من اختبار بسيط للحصول على فكرة تقريبية عن مسامية شعرك:

🔹 اختبار سرعة البلل والتجفيف

اغسلي شعرك بشامبو لطيف، من غير زيوت أو كريمات على الفروة.

لاحظي:

• لو يتبلّ بصعوبة وينشف ببطء شديد → غالبًا مسامية منخفضة.
• لو يتبلّ وينشف بسرعة كبيرة → غالبًا مسامية عالية.
• لو في المنتصف → مسامية متوسطة.

🔹 اختبار كوب الماء (تقريبي)

خذي شعرتين أو ثلاث شعرات نظيفة وجافة.

ضعيها في كوب ماء بدرجة حرارة الغرفة:

• إذا طفت على السطح لمدة طويلة → مسامية منخفضة.
• إذا بقيت في منتصف الكوب → مسامية متوسطة.
• إذا نزلت لأسفل بسرعة → مسامية عالية.

ده اختبار تقريبي، بس بيدّيك فكرة عامة عن قدرة الشعرة على امتصاص المية.